२९ बैशाख २०८३
बाजुराको बुढीगंगा नगरपालिका–३ की वडा सदस्यकाे भिरबाट खसेको ढुङ्गा लागेर मृत्यु भएको छ। मंगलबार साँझ करिब साढे ५ बजेतिर ३७ वर्षीया कल्पना देवी थापाको घटनास्थलमै मृत्यु भएको जिल्ला प्रहरी कार्यालय बाजुराले जनाएको छ। उनी बुढीगंगा नगरपालिका वडा नं. ३ की महिला वडा सदस्य समेत रहेकाे जिल्ला प्रहरी कार्यालय बाजुराले जनाएकाे छ।
जिल्ला प्रहरी कार्यालय बाजुराले दिएकाे जानकारी अनुसार थापा वडा नं. ६ फालासैन बजारबाट घर फर्किने क्रममा माथिबाट अचानक खसेको ढुङ्गा लाग्दा पैदल बाटोबाट करिब ५० मिटर तल सडकमा खसेर घटनास्थलमै मृत्यु भएकाे बताएकाे छ ।
घटनाबारे स्थानीयले टेलिफोन मार्फत जिल्ला प्रहरी कार्यालय बाजुरालाई जानकारी गराएपछि प्रहरी चौकी बार्जुगाडबाट प्रहरीकाे घटनास्थल पुगेकाे छ ।
साथै जिल्ला प्रहरी कार्यालय बाजुराबाट पनि प्रहरी निरीक्षकको नेतृत्वमा थप टोली घटनास्थल तर्फ गएकाे जिल्ला प्रहरी कार्यालय बाजुराले जनाएको छ। घटनाबारे थप अनुसन्धान भइरहेको प्रहरी कार्यालय बाजुराले जनाएको छ।
